XORIJIY VALYUTADAGI KREDITLAR FOIZIGA TA'SIR ETUVCHI OMILLARNI EMPIRIK BAHOLASH

Аннотация

Ushbu ilmiy maqolada O‘zbekiston tijorat banklarining xorijiy valyutadagi kreditlari foiz stavkalariga ta’sir etuvchi omillar empirik jihatdan o‘rganilgan. Tadqiqotda 2017–2024 yillar davrida tijorat banklarining rasmiy statistik ma’lumotlari asosida inflyatsiya darajasi, milliy valyuta devalvatsiyasi, Markaziy bankning real asosiy foiz stavkasi, aholining xorijiy valyutadagi depozitlari hajmi kabi omillar tahlil qilingan. Tadqiqotda strukturaviy vektor avto-regressiya (SVAR) modeli qo‘llanilgan bo‘lib, bu model yordamida omillar o‘rtasidagi o‘zaro bog‘liqlik va dinamik ta’sirlar aniqlangan. Natijalar shuni ko‘rsatadiki, milliy valyuta devalvatsiyasi hamda xorijiy valyutadagi depozitlar hajmi kreditlar foizlariga eng kuchli ta’sir ko‘rsatadi. Shuningdek, inflyatsiya va Markaziy bank asosiy stavkalaridagi o‘zgarishlar ham kreditlar narxiga bevosita ta’sir qiladi. Tadqiqot natijalari tijorat banklarida xorijiy valyutadagi kredit siyosatini takomillashtirish, foiz stavkalarini prognozlash va makroiqtisodiy barqarorlikni ta’minlashda amaliy ahamiyatga ega.